Free Palestain
فلسطيني فضي
الجنس : 
عدد الرسائل : 820
العمر : 36
مكان السكن : غزة
نقاط : 6207
 |  موضوع: هيا و يارا وحوارداخل ثلاجة الموتي  الثلاثاء 23 نوفمبر 2010 - 7:22 | |
|
هيا و يارا طفلتان شقيقتان:
صباحـا ً: تنازعتا على سندويشة "الزعتر"، وتضاحكتا، ووخزت إحداهما الثانية في خاصرتها!
ظهراً : تقرآن درس "الحساب" معاً، وتتراشقان بوسادتين !
عصراً: تنامان كأي حمامتين ذبيحتين على وسادة معدنية في ثلاجة الموتى !!
لم يصل بهما الحمار إلى أي مرفأ، ولم تمدّ المذيعة الحزينة كفـّها من الشاشة لتنتشلهما من
فم الموت ..
ويدور بينهما هذا الحديث في ثلاجة الموتي فتقول الصغيرة لشقيقتها الكبيرة:
يارا: برد كتييييير !! ليش القبر هيك بارد وبيلمع مثل الحديد ؟
هيا: هذا ليس القبر يا حبيبتي .. هذه ثلاجة المستشفى، التي كنا نراها على التلفزيون !!
يارا: هل سترانا بنات صفـّنا اليوم على التلفزيون ؟!
هيا: طبعا، نحن الآن شهيدتان !!
يارا: معقول ؟ انا شهيدة ؟
أنا لسَّـة صغيرة هـَيا !! كنت حابة أصير دكتورة مش شهيدة !!
هيا: نامي الآن، غدا سنذهب الى الله، لازم نصحى بكير!!
يارا: هيـَا .. بتعتقدي مات الحمار ؟
هيا: بيجوز.. بس بتعرفي؟ انا كنت حابّة أكمل المسلسل قبل ما أموت، نيّالهم سماح وعلا رح
يعرفوا شو رح يصير بالآخر!
يارا: ما في تلفزيون بالجنة ؟؟ بنشوفه هناك !
هيا: شفتي شو حلوة طاقية "احمد قريع" امبارح ع التلفزيون ؟
يارا: ههههههه... بس ما بتدفي كتير !!
هيا: تعالي لزقي فييّ .. قربي أكتر حبيبتي..
يارا: هيـَا ليه بـيـضـلـُّو يفتحوا علينا باب الثلاجة؟
هيا: عشان المصورين بيصوروا الشـُهداء
يارا: طيب هلأ بكرة عند الله رح يحطـّوني بالنار؟
هيا: ليه انتي شو عاملة يارا ؟
يارا: بتعرفي الاسبوع الماضي أخذت قلم اياد وما رجعته، خايفة الله يكون زعلان مني
هيا: لا حبيبتي ما تخافي .. اياد أخوكي وهلا بيكون يدعيلك ويقرألك الفاتحة والله رح يسامحك
يارا: بكرة اي ساعة رح نطلع؟
هيا: ما بعرف بالزبط لأنه في شهدا كتير كان اليوم، ورح يكون زحمة كتير
يارا: صحيح هـَيا صحيح !! ممكن بكرة نسأل عن الشيخ احمد ياسين ونسلم عليه هناك
هيا: آه طبعا، وانا بدي أروح أسلم على "أبو عمار" كمان
يارا: آه أنا بعرفك طول عمرك بتحبي جماعة فتح أكتر
هيا: لأ مو هيك بس إنتي بتحبي حماس كتير.. مستغربة ليه!
يارا: مو بابا كان بيحبهم انا كمان بحبهم
هيا: بس ماما كانت بتحب فتح أكتر
يارا: هيا .. ليه ما بيجبولنا أكل هون؟؟
هيا: شو أكل ؟؟ إحنا ميتات يا حبيبتي !! مالك إنت؟
يارا: ميتات ؟؟؟ مو حكيتيلي قبل شوي شهيدات؟؟ انا جوعانة ؟
هيا: اصبري للصبح بتاكلي بالجنة
يارا: ما بدي خلص بطلت أستشهد !! بدّي أروّح !! افتحيلي بدي أطلع ..
هيا: وين بدك ترجعي يا مسكينة ؟
يارا: على بيتنا !!
هيا: بيتنا تهدم حبيبتي وما ضل منو حجر
يارا: بنتخبى بالجامع
هيا: الجامع هدموه كمان
يارا: طيب وين راح "الحمار" ؟ وين تخبّى ؟!
هيا: "الحمار" بيدبر حاله !! ما تخافي عليه
يارا: يعني خلص ما رح نرجع ع البيت ؟
هيا: لأ ! هلأ بيتنا عند الله !!
يارا: أحسن .. في هناك مدارس؟؟
هيا: لأ .. ما تخافي
يارا: طيب في حرب ؟؟
هيا: ما بعرف !! يمكن !!... بتعرفي انا خايفة كتير على بابا..
يارا: ليه ؟؟
هيا: امبارح كان يحكي انو العرب بدهم إيانا نعمل انتفاضة تالتة .. وخايف يموت فيها
يارا: شو يعني انتفاضة ؟
هيا: يعني فلسطينية كتيييييير يموتوا
يارا: وشو بيصير بعدها ؟
هيا: ولا شي !!
يارا: كيف ولا شي يعني ؟؟
هيا: ولا شي !!
يارا: طيب ليه العرب بدهم ايانا ننتفض من جديد ؟
هيا: عشان يحسوا إنو إحنا بنموت وإحنا بنحارب مش وإحنا نايمين
يارا: وهم شو بيفرق معهم ؟
هيا: بيكونوا مرتاحين اكتر !!....يا حرام العرب كتييير بتعبوا وهم يصرخوا ع التلفزيون .. أنا بحزن
عليهم !
يارا: طيب احنا ليش إسرائيل بتكرهنا ؟
هيا: أووف .. انت ليه اليوم اسئلتك كتيرة ؟؟
يارا: زهقانة !!! ما في تلفزيون ولا أكل .. وبرد كتييير
هيا: خلينا بحالنا هلأ وقت تلفزيون ؟!
يارا: شفتي خطيب الجامع عالتلفزيون؟ كان يدعيلنا كتير
هيا: ولك هاد مو خطيب الجامع هاد رئيس حماس !!
يارا: طيب شو يعني المقاومة اللي كان يحكي عنها ؟
هيا: يعني انو ما تهربي من الصاروخ زي ما كنتي بدك تعملي
يارا: يعني هلأ هوي ما بيحب إياد أخوي لأنو هرب من الصاروخ ؟!!
هيا: ما بعرف بس إياد ما بيعرف يقاوم
يارا: طيب هو الشيخ كيف بيقاوم ؟؟
هيا: أوووف !! شو بعرفني اسأليه !!
يارا: بيرموا صواريخ صغيرة ع اسرائيل .. صح ؟؟
هيا: آه ..
يارا: طيب هاي ما بتنفع.. ما بتصيب حدا
هيا: شو رأيك انتي يعني ؟؟
يارا: ما عندو صواريخ كبيرة تقتل كل اسرائيل ؟
هيا: لأ ما عندو اسكتي ..
يارا: ما بدي اسكت .. بدي افهم انا ليش متت ؟؟
هيا: عادي يعني .. مو احنا دايما بنموت ؟
يارا: بس الحمار هرب .. ما مات ..
هيا: لأنه حمار !!
يارا: بتعرفي امبارح شفت "بقج الملابس" اللي بعثوها العرب حلوة كتيييييير... لو ما متنا كان
طلعلي فستان أو لعبة...شو
هالصوت ؟؟؟ سامعة الضجة ؟
هيا: شكله الممرض فاتح التلفزيون .. هاي مظاهرات عشان احنا متنا..
يارا: يعني هلا بيكتبوا عـنا شعر زي محمد الدرّة ؟
هيا: آه بس يا خسارة " درويش" مات .. مين رح يكتب ؟
يارا: عندي فكرة !! بكرة بشوف درويش عند ربنا وبخلـّيه يكتب قصيدة إلنا لحالنا ما حدا يقرأها
غير أنا وإنت
هيا: فكرة حلوة
يارا: طيب احكي للممرض يحط ع المسلسل !!
هيا: كيف احكي؟ انا ميتة مثلك !!
يارا: طيب هلأ بس ينام الممرض رح انزل من هاد الجارور شوي شوي .. ع السُكّيت .. وأهر
ع البيت
هيا: لأ .. إوعي .. بيشوفوكي وبيطخوكي كمان مرة
يارا: ليه ؟؟ بشوف الحمار وين اتخبى وبتخبى مثله
هيا: بيزعل منك شيخ الجامع ؟
يارا: طيب هو شيخ الجامع ليه قاعد جوا التلفزيون؟ ليه مو معانا ؟
هيا: أوووف .. إنتي بدك تخربي بيتنا بكلامك ؟؟
يارا: إنتي مش حكيتي بيتنا تهدم ؟؟
هيا: آه بس قصدي .. خلص اسكتي..
يارا: يا الله لو إني هلأ بالبيت كنت عملت سندويشة لبنة ...
هيا: شو بالك فاضي !!
يارا: طيب خطيب الجامع بيحب سندويشة اللبنة ؟؟
هيا: لأ هو ما بيحب غير الصمود .. بس
يارا: يا الله .. يعني شو اعمل حاسّة بدي أموت ع سندويشة لبنة !!
| |
|
الصرفندية
فلسطيني مبدع
الجنس :
عدد الرسائل : 1877
العمر : 25
مكان السكن : الاردن
نقاط : 6874
| | موضوع: رد: هيا و يارا وحوارداخل ثلاجة الموتي السبت 27 نوفمبر 2010 - 4:29 | |
| | |
|
م.طارق
المدير العام
الجنس : 
عدد الرسائل : 3894
العمر : 36
مكان السكن : ماليزيا
نقاط : 7981
| | موضوع: رد: هيا و يارا وحوارداخل ثلاجة الموتي السبت 27 نوفمبر 2010 - 4:41 | |
|
بارك الله فيكي اختي الفاضلة
Free Palestain
| |
|
